Sa Pagguhit ng Bilog

Hindi ko malilimutan
Ang lahat ng nangyari
Bagama’t sa aking paglisa’y
Makakita ka ng panibagong kakapitan.

Natatandaan ko pa ang lahat,
Kasing linaw ng tubig,
Maaring ito’y kahapon,
Maaring noong isang taon,
Maaring kanina lang…
Nararamdaman ko pa.

Sa’king pagkakaluklok,
Ang hampas ng alon sa pampamg
Ay tulad ng iyong tinig,
Unti-unting humahalik sa’king kaibuturan.

Sa bawat pagsayaw ng alon,
Naaalala kong muli ang malamyos mong galaw.
Sa unti-unting paglubog ng araw,
Ang iyong matamis na ngiti,
Muli…
Ang ala-ala ay nagbabalik,
At nagbibigay ng aking katahimikan.

Ngayon,
Ang araw ay nagpapaalam na,
Tulad ng aking pag-alaala sa’yo,
Sa’yong kabuuan,
At ang aking pag-iisa.

Bukas…
Ako’y muling maglalakbay,
Ngunit…
Patuloy kong matatandaan ang lahat,
Kasing linaw ng tubig.
Maaring ito’y kahapon,
Maaring noong isang taon,
O maaring kani-kanila lang,
Nararamdaman ko pa ang lahat…
Nararamdaman ko pa….

November 14,1997